गट ग्रामपंचायत बोरांडा–शिळ–बांगरचोळे, तालुका विक्रमगड, जिल्हा पालघर ही प्रामुख्याने आदिवासी व ग्रामीण लोकवस्ती असलेली ग्रामपंचायत आहे. या परिसरात पारंपरिक आदिवासी संस्कृती, रीतिरिवाज व सण-उत्सव आजही जपले जातात. गावातील देवस्थाने, समाजमंदिरे व विविध सामुदायिक कार्यक्रम हे ग्रामस्थांच्या सामाजिक व धार्मिक जीवनाचे महत्त्वाचे केंद्र आहेत.

सन २०११ च्या जनगणनेनुसार या गट ग्रामपंचायतीत सुमारे ६०० कुटुंबे वास्तव्यास असून एकूण लोकसंख्या अंदाजे ३०२९ आहे. यामध्ये १५१७ पुरुष व १५१२ महिला आहेत. या भागात प्रामुख्याने आदिवासी व कुणबी समाजातील लोक राहतात. कुणबी समाज शेती हा मुख्य व्यवसाय म्हणून करतो, तर आदिवासी समाजातील लोक शेतमजुरी, वीटभट्टीमजुरी तसेच इतर मजुरीची कामे करून उपजीविका करतात. याशिवाय काही प्रमाणात कुक्कुटपालन व बकरीपालन देखील केले जाते.

ग्रामपंचायतीच्या हद्दीत जिल्हा परिषद प्राथमिक शाळा, अंगणवाडी केंद्रे, समाजमंदिरे तसेच आरोग्य सेवा देणारे उपकेंद्र यांसारख्या मूलभूत सुविधा उपलब्ध आहेत. तसेच पिण्याच्या पाण्याची व्यवस्था, सार्वजनिक विहिरी, शेततळी व इतर सामाजिक सुविधा ग्रामस्थांच्या वापरासाठी उपलब्ध करून देण्यात आल्या आहेत.

पावसाळ्यात, विशेषतः श्रावण महिन्यात, या परिसरात “अळंबी” ही नैसर्गिक भाजी मोठ्या प्रमाणावर उगवते. आदिवासी बांधव पहाटे लवकर उठून ही भाजी फुलण्यापूर्वीच गोळा करतात व स्वच्छ करून बाजारात विक्रीसाठी नेतात. हा अल्पकालीन व्यवसाय पावसाळ्यात त्यांना अतिरिक्त उत्पन्न मिळवून देतो.

ग्रामपंचायत स्थानिक विकास, स्वच्छता, पाणीपुरवठा तसेच विविध सामाजिक उपक्रम राबविण्यासाठी सातत्याने कार्यरत असून गावांच्या सर्वांगीण विकासासाठी प्रयत्नशील आहे.